Tíðindaskriv um barnaansingina
- Detaljer
-
Lagt út fríggjadagin, 7. august 2020 14:27
Tíðindaskriv um barnaansingina
COVID-19 smittan ger nú aftur um seg í føroyska samfelagnum. Staðfest er, at smittan breiðir seg skjótari enn áður, og at smittutilburðirnir eru metnógvir og í fleiri støðum í landinum - eisini her hjá okkum. Tilmælini um at halda frástøðu og hava gott reinføri eru týdningarmiklari enn nakrantíð. Hóast myndugleikarnir gera alt, sum neyðugt er, fyri at basa smittuni, so tykist tað soleiðis, at tamarhald er ikki á støðuni í løtuni.
Støðan viðvíkjandi COVID-19 er sostatt sera álvarsom, ógreið og órógvandi, og nær ein greiðari støða fyriliggur, er ringt at vita.
Alvalon hevur havt opið fyri nøkrum fáum børnum úr oynni í summarfrítíðini, og ætlanin var at lata hurðarnar upp fyri øllum børnunum í kommununi mánadagin í næstu viku – hin 10. august.
Men Sørvágs kommuna metir, at tað, - grundað á óvissuna, ið ræður í løtuni, og fyri at minka um smittuvandan, er skilabest, at virksemið á ansingarøkinum verður avmarkað næstu dagarnar, til myndugleikarnir hava fingið betri yvirlit yvir koronasmittuna, og vit vita, um tað eru fleiri her í kommununi, ið eru smittað.
Í samstarvi við leiðsluna í Alvalon er tí gjørt av, at stovnurin Alvalon letur ikki upp nú mánadagin. Ístaðin byrjar virksemið aftur mánadagin hin 17. august 2020.
Neyðansing
Er tað onkur, ið als ikki fær havt børnini heima ella onga aðra ansing fær, verður viðkomandi biðin um at seta seg í samband við leiðsluna á Alvalon á tlf. 233240
Fylgt verður við gongdini í COVID-19 málinum, og støðan verður javnan eftirmett. So skjótt annað fyriliggur og onnur avgerð er tikin, verður kunnað um tað.
Vinarliga
Sørvágs kommuna
Aimé Jacobsen, borgarstjóri
